විකුනණවා , බදු දෙනවා, ආයෝජනය කරනවා.


අපේ රටේ පාලන විධිය ප්‍රජාතනත්‍රවාදීය. පාර්ලිමේන්තුවේ ආණ්ඩු පක‍්ෂයක් ඇත. විරුද්ධ පක‍්ෂයකුත් ඇත. මේ ආණ්ඩුපක්ෂය බොහෝ දැන උගත්ය. සවන්දීමට අකමැතිය. සර්වබලධාරීය. විපක්‍ෂයේ සිතිවිලි සංකල්ප  ඊට දෙවෙනි නැත. ආණ්ඩුව කරන කියන දෑ සියල්ලම වැරදිය.දුර්දාන්තය,මෝඩ තීරන ගන්නා තකතීරුවෝය.

බලය නැති විට ආණ්ඩුව දේශද්‍රෝහීය.

2020 වර්ෂයේ විදේශ ණය වාරිකය ගෙවා අවසන් කල බව මහ ලොකුවට කියති. මේ වර්ෂයේ අපි ගෙවිය යුතු ණය වාරිකය පමණක් ඩොලර් බිලියන 6895 ක් යයි පැවසේ.මේ කටයුත්ත අපේ නිවසකට ආදේශ කලොත් ……බැංකුවෙන් පඩි පත ණය වාරිකය අඩු කර ඉතිරිය අතට ලැබෙන රජයේ හෝ පෞද්ගලික අංශයේ සේවා දායකයාත් , බැංකුවට ඇප කර තබා ඇති අවිනිශ්චිත ආදායමක් ලබන ආයෝජකයාත් ගෙවන්නේ……..අපේ රට පත්වී ඇති තත්වයෙනි.

ඩොලර් බිලියන 6895 ක් අපේ රටේ උපයා ගැණීම සිදුවේද ?.

එය ගෙවීමටත් අපි ණය ගනිමු. උපයා ගන්නේ සුළු ප්‍රමානයකි.අපිට උරුමව ඇත්තේ …..නැතිනම් උරුම කර ගෙන ඇත්තේ කඩෙන් දැන් කලෙනම් සුපිරි වෙළද සැල්වලින් මල්ල පුරවා ගෙන විත් බඩ පිරෙන්න කන ආර්ථිකයකි. මෙයට වියත් භාෂවෙන් පරිභෝජන ආර්ථිකයක් යයි කියති මගේ කුඩා කාලය  ගෙවෙන්නේ නාගරිකයන් කියනා අන්දමට හද්දා පිටිසර ගම් පොකුරකය. (මින් ඉතාමත්ම සරු බිම් අයිතිව තිබු ගම්මාන කිහිපයක් සමනල වැව ජලාශය විසින් ගිලගන්නා ලද්දේය.) අපිට එදා නිවසේ අවශ්‍යතා සදහා කඩේ යන්න සිදුවුයේ භූමිතෙල් , ළුණු, කරවල දුම්කොළ සහ සබන් වැනි ද්‍රව්‍ය කිහියක් සහ රෙදි පිළි අවශ්‍යතා සපුරා ගැණීමට පමනි. වී සහ එළවළු අතිරික්තය ගමේ කඩමණ්ඩියේදී හුවමාරු විය. ජීවිතය සරළව කාටත් අතනොපා ගෙවී ගියේය.

මෙයට වියතුන් මහාප්‍රාණ යොදා නිෂ්පාදන ආර්ථිකයයි කියනු ඇත.

අද ගමේ තරුන තරුනියන් ගමේ නිෂ්පාදන ආර්ථිකයට දායක වන්න ගමේ නැත. ඔවුන් ජාතික නිෂ්පාදන ආර්ථිකයට දායක වන්න දහඩිය හෙලන්නට නගරයට ගොසිනි. සංවර්ධණය මුවා වෙන් විදේශ හෝ දෙශීය ණය ලෙස ආයෝජනය වන ශ්‍රම වෙළද පලේ මොවුන් විකිනෙති. පිරෙන සාක්කුව හිස් වෙන්නේ විදේශිය අරුමෝසම් භාණ්ඩ වලටය.අසීමාන්තිකව ඒ සදහා මුදල් යලි විදේශ ගතවේ. වියතුන් අපනයන ලෙස මෙය හදුන්වයි.

කොළඹ වරායේ නැගෙනහිර පර්යන්තය ගැන බොහෝ කතාය. කෙනෙක් විකිණිය යුතුයයි කියයි. තව එකෙක් බදු දිය යුතුයයි කියති. මට හිතෙනා අන්දමට දැන් කියනු ලබන්නේ ආයෝජනය කිරීමට ඉන්දියාවේ අදානි සමාගමට ආරාධනා කර ඇති බවකි.ආයෝජනය කරනු ලබන්නේ ලාභ ලබන්නටය. අපේ ඇත්තෝ ලාබ බෙදන්නට කැමති නැත.අපි සුබ සාධනයට බොහෝ ඇළුම් කරන්නේය. සැම විටම විරුද්ධ පක්‍ෂය යනු විරුද්ධ පක්‍ෂයයි.

මේ වෙලාවේ හොදම දේ විරුද්ධ පක්‍ෂයේ සමාගමක් පිහිටුවා කොළඹ වරායේ නැගෙනහිර පර්යන්තය සංවර්ධණය කර පවත්වා ගෙන යාමට ඔවුන්ට ඉඩදීමය. ජනාධිපති තුමනි මේ අදහස ගැනත් සලකා බලනු මැනවි.