අද ජනවාරි  29යි.

දිනපොතක් ලියන්න හිතා ගත්තත් ඒක පිලිවෙලකට වෙන දෙයක් නෙමෙයි. 2011 කඩින් කඩ ලිව්වා වගේ 2012 ත් දින පොත කඩින් කඩ ලියවේවි.

අද අවුරුදු 35 කට විතර පස්සේ පාසල් වියේ සගයෙක් මුණ ගැහුණා.ආයෙත් පාසල් යන්න හිතෙන්නේ පාසල් කාලයයේ  සුන්දරත්‍වය පහුරු ගාන කොට. අපි පාසලේ ඉන්න කාලේ ජාතික මට්ටමෙන්  පාසල් නාට්‍ය තරග තිබුනා. ඒවට සුදානම් වෙන්න මධ්‍ය මහා විද්‍යාල වල තිබුනේ හරි උනන්දුවක්.

හොරණ තක්‍ෂිලාව., හොරණ විද්‍යාරත්නය මේ නාට්‍ය උලෙලවල් වල කැපී පෙනෙන පාසල් වුනා.  තක්‍ෂිලාවේ අල කලංචිය , විද්‍යාරත්නයේ” සුදු ඇතා ආවට පස්සේ “, “ආඩි ටිකයි අම්බලමයි ’ ජාතික මට්ටමේ සාකච්චා වුන නාට්‍ය බවට පත්වුනා. මේ නාට්‍ය වලින් බිහිවු නළු නිලියෝ අද නාට්‍ය ක්‍ෂෙත්‍රයේ ටෙලි නාට්‍ය , චිත්‍රපටි ක්‍ෂෙත්‍රයේ දැවැන්තයෝ බවට පත්වෙලා ඉන්නවා. එයාලගේ දරුවොත් දෙවෙනි පරම්පරාවේ චරිතවෙලා කැපී පෙනෙනවා. අද පාසල් වල එවැනි සෞන්දර්යාත්මක ක්‍රියාන්විත නැහැ.

ඒවට දරුවෝ එකතු වෙන්නේ කොහොමද , දෙක තුන වසරේ ඉදන් දරුවෝ උදේට පාසලෙන් නිදහස් අධ්‍යාපනයත් හවසටත්  සති අන්තවලත් ටියුෂන් කඩෙත් අධ්‍යාපනය ලබා ගෙන  පහ වසරේ ඉදන් විභාග වලටම සුදානම් වෙන කොට. අම්මලා තාත්තලා දරුවෝ සුදානම් කරන්නේ මේ විභාගවලට විතරයි. ලොකු මහත් වලා සමාජයට ආවම මේ දරුවෝ කරකවලා අත ඇරියා වගෙයි. වැඩ කරන්නේ කම්පියුටර්ස් වගෙයි. දීලා තියෙන දත්ත වලින් පිටතට කිසිම කටයුත්තක් නැහැ.

සමාජය  සංස්කෘතිය සලකන්නේ නැහැ. වැඩිහිටියෝ අදුනන්නේ නැහැ. ආදරය කරුනාව හදුනන්නේ නෑ. මේ සිතිවිලි  - කතා අස්සට නස්රුදීන්ගේ කතාවක් ඇදිලා ආවා  ආදී මිත්‍රයාගෙන්.

උඹ දන්නවද නස්රුදීන් ?.

මමත් නස්රුදීන් ප්‍රිය කරන චරිතයක්.  මම අහගෙන ඉන්නව.

ඔන්න දවසක් නස්‌රුදීන් හමුවෙන්න ආවා. මහාචාර්ය කෙනෙක්. මේ මහාචාර්යතුමා ඇවිත් නස්රුදීන්ට තමන්ව හදුන්වා දුන්නා මම භෞතිකවාදියෙක් කියලා‌. මම ශාස්ත්‍රය පිලිබද කෙල පැමිණියෙක්.

මට මතක් වුනේ කැළණියේ ආචාර්ය තුමා. එතුමා තමන්ගේ ගෝලයෝ ටිකත් එක්ක අනාගෙන. මම අතුරු කතාවකට ආවා.

නෑ මචං .,  ගුත්තිලටත් හිටියානේ මුසිල වගේ ගෝලයෝ  කියලා අතීත කතිකාවකට සමාන කරපු මිත්‍රයා නස්රුදීන් හමුවෙන්න ආපු මහාචාර්ය තුමා ගේ කතාවට ආයෙත් පීල්ල මාරුකලා.මේ මහාචාර්ය තුමා නව සොයාගැණිමක් කරගෙන. මොකක්ද දන්නවද ?  ලෝකේ නිර්මාණය වුන හැටි.

මම ඇහුවා මිත්‍රයා ගෙන් ආකිමීඩිස් වගේද නස්රුදීන් ගාවට මහාචාර්ය තුමා දුවගෙන ආවේ කියලා?.

පිස්සුද මචං… මේ යෝධයා අවුරුදු ගානකින් නාලවත් නැති එකේ ඒ වගේ එන්නේ කොහොමද ?.  කියන ගමන් ලෝකේ හැදුන හැටි ගින්දර සුළඟ හා වාතය වැනි දේවල් එකට එකතුවෙලා නේ ලෝකේ හැදුනේ  ! . මහාචාර්ය තුමාගේ මතය කිව්වා.

මේ අදහසට නස්‌රුදීන් කෙහොමවත්  එකඟ වුණේ නෑ. ඒත් මහාචාර්තුමාගේ තර්ක විතර්ක න්‍යායන් ඉදිරිපත් කිරීමේ සීමාවක් කෙලවරක් නෑ තමන්ගේ මතය තහවුරු කරදෙන්න.අන්තිමේ මේ කරදරය ඉවර කරන්න බැරිම තැන මහාචාර්තුමාගේ කණට කරල නස්රුදීන් මෙහෙම කිව්වා.

“ඈ මෝඩයො උඹට තාම තේරෙන්නෙ නැද්ද? මොනව හරි හදන්න ගත්ත දේවල් නෙවෙයිනේ හැදුනට පස්‌සෙ තියෙන්නෙ.”

මහචාර්යතුමා නිහඩ වුනා. නස්රුදීන් බුරුවා පිටේ නැගලා යන්න ගියා.

මගේ මිත්‍රයා මේ කතාව කිව්වේ මහාචාර්ය ආචාර්යවරු ඉන්න තැනක තම දියණිය දේශකයෙක් වෙලා පත්වීමක් අරගෙන ඇවිත් නතර කරලා යන ගමන් අවුරුදු තිස්පහකට විතර ඉස්සර අවසාන වරට මුණගැසුන කඩුල්ල සොයාගෙන ඇවිත් සාමිචියක යෙදෙන අතර. ආචාර්ය මහාචාර්යවරු නොවුන පාපයෙන් කඩුල්ල ජීවිතේ හැරවුම් ලක්‍ෂයකින් අංශක 90ක් හරවා ගෙන වර්තමාන ජීවිතයට හුරුවුන හැටි මිත්‍රයාට සුරංගනා කතාවක් වුනත් අවුරුදු තිස්පහකට පස්සේ ජීවිතේ සැදෑ සමයට පත් අපි කවුරුත් ඉන්නේ එකම තැන බව පවසලා කඩුල්ලෙන් මිත්‍රයා සමුගත්තේ   ආයෙත් හමුවන්න එන බව පවසමින්.

13 වෙනි සංශෝධණය අවතාරයක් වගෙයි. කාලයක් යටපත්ව තිබිලා නැවත මතුවෙනවා. නැවතත් සද්ද බද්දයක් නැතිව ඉදන් ආයෙත් කතාබහට ලක්වෙනවා. ජේ.ආර්.ජයවර්ධණ ජනාධිපතිතුමාට පරිප්පු දාගෙන රජිව් ගාන්ධි ගුටිකාගෙන  මෙරටට ඉන්දියාවෙන් ගෙන ආ 13 වෙනි සංශෝධණය එදා ශ්‍රීලනිප වර්ජනය කලා වගේම ගාමිණි ජයසුරිය වැනි ඇමතිවරුන් දේශපාලන බිමෙන් ඉවත් වෙන්න තරම් බලපෑමක් ඇති කලා.

13 වෙනි ශංශෝධණය අපේ කරේ ගැහුවේ උතුර – නැගණහිර තිබුනා කියන දේශපාලන ප්‍රශ්ණයට විසදුමක් හැටියට. උතුර -නැගෙණහිර ඒකාබද්ධ කරන්නත් බලවත් ඕන කමක් එදා තිබුනා. ඒත්  ජනමතවිචාරණයක අවශ්‍යතාවය ඇතිවෙලා තිබුන නිසා ඒ වැඩේ දිනෙන් දිනේ කල් ගියා.
උතුරට සහ නැගණහිරට හැර රටේ අනෙක් පලාත් වලට ඕන කමක් නොතිබුන පලාත් සභාවක් පිහිටුවලා එපා කියාපු අයත් දැන් ඒකේ වාඩිවෙලා ජනතාව සුරා කනවා. මේ පුංචි රටේ ඔය තරම් ආණ්ඩු මොනවටද හරියට සමබර පාලන විධියක් තියෙනව‍නම්. ද්‍රවිඩ ජනතාවට අසාධාරණයක් වෙලා තියෙනවා කියනවා. හරියට කිරලා මැනලා බැළුවොත් අසාධාරණයක් වෙලා තියෙන්නේ සිංහල ජාතියට . ඒත් සිංහල ජාතිය ඉවසා ගෙන ඉන්නව.

වර්තමාණයේ සාකච්චා වන ගැටළුව පලාත්  සභාවලට ඉඩම් සහ පොලිස් බලතල  අවශ්‍යය යයි කියන එක. මතකද වර්ධරාජා පෙරුමාල්…………..?. අන්තිමට වෙනම රාජ්‍යයක් ප්‍රකාශ කරලා රටින් පැණ ගිය මහ ඇමති.
එදා උතුරේ සිටි මහ ඇමැති වර්ධරාජා පෙරුමාල් ද්‍රවිඩ තරුණයන්ව බලහත්කාරයෙන් බදවා ගෙන  සිවිල් බළකාය පිහිටුවනු ලැබුවා. ඒකත් පොලිසියක් වගෙයි. ද්‍රවිඩ සන්ධාන දේශපාලකයන්ට අවශ්‍ය බලතල විතරයි. රටේ කොයි දේශපාලනඥයත් එක වගෙයි. උතුර  දකුණ කියලා වෙනසක් නැහැ. ඒ මිනිස්සුන්ට ඔන බලතල විතරයි.ප්‍රභාකරන් අවුරුදු 30ක් තිස්සේ උතුරේ සහ නැගනහිර ජනතාව හිර කරගෙන අප්‍රමාණ දුකට පත්කලා. එදා ඒ මිනිසුන් වෙනුවෙන් කතා කරන්න ද්‍රවිඩ සන්ධාන දේශපාලකයන්ට ප්‍රභාකරන් ගාවට යන්න හයි හත්තිය තිබුනේ නෑ. ප්‍රභාකරන්ගේ උන්ඩයට බයේ ප්‍රභාකරන්ගේ හොරණෑව වෙලා හිටියා. අද ඔවුන්ගේ බලතල වැඩිකරගන්න  ඉඩම් සහ පොලිස් බලතල   ඉල්ලනවා .

කඩුල්ල හිතන්නේ උතුරු නැගෙනහිර ද්‍රවිඩ ජනතාවට පොලිස්‌ බලතල සහ ඉඩම් බලතල  අවශ්‍ය නැහැ කියලා. 13 වැනි සංශෝධනයත් ලංකාවටම  අවශ්‍ය නැහැ කියලා. පලාත් සභා කියන්නේ සුදුම සුදු අලියෙක්. කරන වැඩක් නැති කතා සාප්පුවක්. පිරිසකට බඩ තර කරගන්න හදාපු තවත් දේශපාලන මස් කඩයක්.

ද්‍රවිඩ සන්ධානය  ඉල්ලන මේ බලතල පළාතේ මහ ඇමැති වෙත දුන්නොත් ඒ ප්‍රදේශ වල පදිංචි  සිංහල හා මුස්‌ලිම් ජනතාවට අගතියක්‌   වෙන්නේ නෑ කියලා අපිට නිශ්චය කරන්න බැහැ.  මේ ගොල්ලා කරන වැඩ  බලාගෙන ගියාම. පොලිස්‌ බලතල ඉල්ලන ද්‍රවිඩ සන්ධානය වැල්ලවත්ත හා කොළඹ අවට සිටින ද්‍රවිඩ ජනතාවත් උඩරට ද්‍රවිඩ ජනතාව ගැනත් හිතන්නේ මොනවගේ අදහසක්ද ?. කියලා හිතා ගන්න බැහැ. මේ ප්‍රදේශවල වැඩි ජනගහනයක් ද්‍රවිඩ ජනතාව. ඒ මිනිස්සු ත් සිංහල ජනතාව වටේ ඉන්නවා කියලා වෙනම පොලිසියක් ඉල්ලයි.

මුලින්ම කඩුල්ල සදහන් කලා කොයි දේශපාලනඥයත් එක වගෙයි කියලා. ද්‍රවිඩ සන්ධානයේ සම්පන්දන්ලා ද්‍රවිඩ ජනතාවට ලබාදුන්  දෙය මොකක්ද  කියලා   ඔවුන්ගේ හදවතට තට්ටු කර විමසන්න ඕනි. ඔවුන් අද වන තෙක්‌ කිසිම දෙයක්‌ ද්‍රවිඩ ජනතාව වෙනුවෙන් ලබා දීලා නැහැ. ඔවුන් කරන එකම දෙය රට රට වල ඉන්න ද්‍රවිඩ අන්තවාදීන්ගේ  සල්ලි ගරා ගන්න මොකක් හෝ උප්පරවැට්ටියක් කරන එක  පමණයි.

ජනතාවට අවශ්‍ය සාමය සෞභාග්‍යය . මේ ගොල්ලා ඉල්ලන්නේ බලතල.

අධිවේගි මාර්ග ඇතිවිය.  නෙළුම් පොකුණු ඇතිවිය. දැන් කතා බහ තවත් නෙළුමකි. ඒ කොළඹ ඞී.ආර්. විජයවර්ධන මාවතේ බේරේ වැව අද්දර ඉදිවන ”නෙළුම් කුළුණ” යි.

මට මතක් වන්නේ අපේ අල්ලපු ගෙදර ගුණරත්න මහත්තයයි. ඹහු රජයේ සේවකයෙකි. බිරින්දෑ ගුරුවරයෙකි. ඒ නිසා දෙදෙනාම රජයේ සේවකයෝය.  මීට අවුරුදු තිහකට පමණ පෙර අපේ අසල්වාසීන්වු මේ යුවල පර්චස් විස්සක ඉඩම මිළදී ගෙන අවුරුදු පහක් පමණ කල් මරමින් සිට ‍අසම්පූර්න නිවසක් ඉදිකරගෙන එහි පදිංචියට ආවාය. ඉනුත් අවුරුදු දහයක් පමණ ඉකුත් වන තෙක් නිවසේ වැඩ නිමකරන්න බැරිව ලතවුන මේ යුවල යාන්තම් විශ්‍රාම යන්න ඔන්න මෙන්න කියා නිවස අංග සම්පූර්ණ කරගත්තාය. නිවසේ මේස පුටු වැනි ගෘහ උපකරණ ආදිය පහසු ගෙවීමේ වාරික ක්‍රමයට ගෙන අවුරුදු විස්සක් පමණ ගතවීත් තවමත් නිවාස ණය, ගෘහ උපකරණ ණය  ගෙවමින් ජීවිතේ සැදෑ කාලයද ණය බරින් මිරිකී තෙරපී අවිවේකී බවින්  පීඩිතව කල් ගෙවමින් සිටීන්නේ‍ය.

ජනජීවිතේ පැතිකඩක්වු ගූණරත්න මහත්තයාගේ ජීවිතයට සමාන ජනගහනයෙන් හතරෙන් පංගුවක් වත් නැති තරම් වන අතර ඉතිරි කොටස හිසට නිසි වහලක් බඩට නිසි අහරක් නැති ගතට නිසි පහසුකම් නැති ජනගහනය  දෙගුණයද ඉක්මවා යන පිරිසකි. මොවුන්ට ස්ථීර ජීවෝනාපා මාර්ග නැත.  තීරණ ගන්නා  එම තීරණ ක්‍රියාත්මක කරවන ඉතා කුඩාම පාලක පිරිසක් සියළු සැප සම්පත් විදිමින් ඒ ඇසුරින් අත්දැකීම් ලැබ කරනා සැලසුම් සදහා ජන ජීවිතයේ ප්‍රමුඛතා හදුනාගන්නේ නැත. ඔවුන්ගේ සීන ලෝකයේ   දකිනා සීන යතාර්තයක් කර ගැණිමට දුක්විදින පීඩිත ජනතාවගේ ලේ කදුල සහාසිකව සූරා ගන්නා බවවත්  ඔවුන්ට දැනෙන්නේ නැත.

අප උපයන සොච්චම බදු ලෙස සූරාගෙන අපට පහසුකම් ලෙස පෙරලා ලැබෙන ප්‍රමාණයත් ඒ බදු මුදලින්ම සූරා ගන්නා පාලක සමාජය ලබන ප්‍රතිශතයත් ගණණය කලහොත්  මේ දෙක අතර වෙනස අහස හා පොලොවට සමාන විය යුතුය. මේ සුරාකන සමාජයේ සිතුම් මත ඉපදෙන නෙළුම – සුපින්වත් බවේත්, සෞභාග්‍යයේත් සංකේතයක් යයි පවසන්නේ කෙසේද ? සාමය සෞභාග්‍ය ගැන හැඟීම් දනවන නිසාවෙන්ම නෙළුමක හැඩය ගත්  කුළුණට නෙළුම් කුළුණ යැයි නම් තැබූ බව කියති.

අපි සාමය යනුවෙන් අදහස් කරනුයේ පසුගිය අවුරුදු තිහක් ගෙවා දැමු යුද්ධයේ බියකරු බව පහවී යාම පමනක්ද?. අපිට ආර්ථික සාමයක් තිබේද ? ඒ නිසාම අපි අපේ සමාජය තුල සාමයෙන් ජීවත්වන්නේද ?. අප අපේ පවුල තුල  සාමයක් පවත්වාගෙන යත්ද?.  මා මුලින් කිවු වියපත්  මගේ අසල්වාසී ගුණරත්න මහතා අප දුටු දා සිට සාමයෙන් ජීවත්ව ඇත්ද ?.

මීටර් හයසිය තිස්හතරක් (634)  උසින් යුතුව ලෝකයේ උසම කුළුණ ජපානයේ ඉදිවෙමින් පවතී. එහි ඉදිකිරීම් නිමකිරීමට සැලසුම් කර ඇත්තේ   මේ   වසරේ    පෙබරවාරි  මාසයේදීය. ”ටෝකියෝ ස්කයි ටී‍්‍ර” ලෙස ලෝකයේ මේ උසම කුළුණට නම් තබා ඇත. අපේ පාලකයෝ ශ්‍රී ලංකාවේ දකුණු ආසියාවේ උසම කුළුණ  ඉදිකරයි.  එහි උස මීටර් 350 කි. හෙක්ටයාර් 3.06 ක භූමි භාගයක බේරේ වැව ආසන්නයේ මෙම කුළුණ ඉදිවේ.

දියුණුවු ජපානයට මේ මොහොතේ කළ හැකි ඔවුන්ට ගැලපන දේ අපට මේ මොහොතේ ගැලපෙන්නේද ? මීට වඩා ප්‍රමුඛත්වය දිය යුතු වෙන සංවර්ධණ  කටයුත්තක් අපට නැතිද ? 

ඊසොප් ගේ උපමා කතා අපි  අසා  ඇත්තෙමු. කොතෙකුත්ඒ කතා අසා ඇතත් නැවත නැවතත් එකම කතාව වුනත් ඒ කතාවක් නැවුම් බවකින් අසන්නට අප කැමත්තෙමු.

උපමා කතා ජන සාහිත්‍යයේ අංගයක් වන අතර සැබැවින්ම සාමාන්‍ය ජීවිතයේ පැවත්ම පිළිබදව උපමා කතාවෙන් නිරූපනය වන බව පැහැදිලි වන්නකි.මේ ඊශෝප් කතාව ගෙතෙන්නේ බොරු කොණ්ඩා කාරයෙකුට වු ඇබැද්ධියක් වටා .

බොරු කොන්ඩා පැලදීම  නුතන මෝස්තර අතරට එක්වී ඇති අළුත්ම මෝස්තරයක්. කොණ්ඩයතිබුනත් බූ ගාගෙන තට්ට හිසට මෝස්තර කොණ්ඩ පලදින අයත් ඉන්නවා. මෙ යුගයේ ඒ තට්ටයෝ  ගමන් කරන්නේ අශ්වයෝ පිට නොවෙයි.  වාත වේගයෙන් යන යකඩ අශ්වයෝ පිට. හෙල්මටයන් පැළද ගෙන යාම අනිවාර්ය නීතියක් නෙවෙන්නට මේ තට්ටයන්ගේ කොණ්ඩත්  මහ මගදී අපිටත් අහුලා ගන්න පුළුවන් වෙනවා.

ඊසොප් ජීවත් වු යුගයේ  යකඩ අශ්වයෝ හිටියේ නැහැ.  වේගවත් ගමනකට අශ්වයෝ යෝදා ගත් බව අප දන්නවා.

ඊසොප් දින පොතට කතා එකතු කරමින්  විමසිල්ලෙන් ඉන්නා දවසක,  තට්ට හිසක් ඇති තරුණයෙක් තමන්ගේ හිසට නොසරිලන ලොකු ඔළුවක් ඇති තට්ට මිත්‍රයෙකුගේ බොරු කොණ්ඩයක් පැලදගෙන විදුලි වේගයෙන් අශ්වයෙකු පිට යන අයුරු දැක්කා.   ඊසොප් ගේ ඉවට අද නම් හොද නිර්මාණයක් ලැබේයයි විමසිල්ලෙන් මේ තරුනයාගේ ගමන දෙස අවධානයට යොමු වුනා. මේ තරුණයාගේ අශ්වයා පිට යන වේගය දෙස බලා සිටින ඊසොප්ට  ඔහුගේ බොරු කොණ්ඩය  සුලගට ගසා යන අයුරු දැක්කා.

මේ අපුරු දර්ශණය ඊසොප් හැර තවත් කොල්ලෝ රෑනකගේ ඇසට ලක්වුනා. කොල්ලන්ට මේක නියම දර්ශණයක්. කොල්ලෝ  මහ හඩින් සිනාවෙමින් අත්පුඩි තලමින්  අසරුවා සමච්චලයට පත්කලා. අසීරුවට පත් අසරුවා  අශ්වයා නතර කර අසු පිටින් බැස කොල්ලන් ලගට එනු දුටු ඊසෝප් මොකක් හරි ගැටුමක් ඇතිවේයයි අනුමානය කලා.  ඊසොප් පිරිස අතරට පැමිනියේ ගැටුමක් ඇතිවුවහොත් එය සමථයකට පත් කරන අන්දම සිතිවිල්ලකට නගමිනි.

ඒත් කොල්ලන් ලගටට පැමිණි තරුණයා බොහෝම සන්සුන්ව  “බලන්නකෝ මගේ ඔළුවේ මේ කොණ්ඩය රදවා තියෙන එක පුදුමයක්යැ .. මේක වැඩුණු ඔළුවෙවත් මේක රදව ගන්න මේ කෙස් ටිකේ අයිතිකාරයට බැරිවුන එකේ  ?.” කියා සිද්ධිය ගාණකටවත් නොගෙන බිම තිබු බොරු කොණ්ඩය අහුලා ගෙන නැවතත් හිසේ පැළද ගෙන තමන් ආ ගමන පිටත්වී ගියා.

ගැටුම සමථයකට පත් කරන සිතිවිල්ලෙන් මිදුන ඊශෝප් තම සටහන් අතරට මෙන්න මේ අදහස  එකතු කර ගන්න හිතේ සටහන් කර ගත්තා .

“අපි උපදින්නේ ඇගේ නූල් පටක්වත් නැතිව.අපි මේ ලෝකේ අත්හැරයන්නෙත්  මේ මොනවත් අරගෙනත් නෙමෙයි. අපිට උපතින්ම උරුම නොවු දේවල් ස්ථිර වස්තුන් වෙන්නේත් නෑ.  කොණ්ඩය හුළගේ ගියා වගේ අහඹු සිදුවීම් අපේ ජීවිතේ  ඕන තරම් වෙනවා. ඒවගේ අවස්ථාවල අපි පශ්චාතාප ‍වෙන්නේ ඕන නැහැ. කලබල වෙන්න ඕනත් නැහැ.” 

කඩුල්ලී කලක් සමාජ අධ්‍යයන විෂයය ඉගැන්වු ගුරුවරියකව සිටියාය. ඈ පාසල් යන්න සැරසෙන අතර  පාන්දර හයට විකාශණය වන ගුවන් විදුලියේ ප්‍රවෘත්ති අසන්නීය. ඈ හවස හයේ ප්‍රවෘත්ති සහ  නවයේ ප්‍රවෘත්තිත් අනිවාර්යෙන්ම අසන්නීය. මේ පිලිවෙත ඇයගේ උගන්වන විෂයයට අත්‍යවශ්‍ය දෙයක්වු බැවින් ඈ ප්‍රවෘත්ති ඇසු අතර කඩුල්ල ඇසෙන බැවින්  ප්‍රවෘත්ති අසන්නට හුරුපුරුදු විය.  කඩුල්ලට  1970 බලයට පත්වු සමගි පෙරමුණ රජය කාලේ සිට යම් දේශපාලන මතකයන් ඇතිවුවත් ගුවන් විදුලියේ ප්‍රවෘත්ති විකාශන පිලිබදව නිශ්චිත මතකයක් නැත. 1978 කාලයේ සිට කඩුල්ලීත් සමග  ප්‍රවෘත්ති අසන්නට පෙළබුන බැවින් ප්‍රවෘත්ති ප්‍රචාරය පිලිබද යම් මතකයක්  1978න් පසු කාලයේ ඉතිරිව ඇත.

කඩුල්ල 1965 කාලයේ පටන් පලවු  දවස  සහ දිණමිණ ප්‍රවෘත්ති පත්‍ර නොකඩවා කියවු පාඨකයෙකි.එකල මෙම මාධ්‍යයන්ට ආණ්ඩු හැසිරවීමේ යම් බලයක් තිබු බව කඩුල්ලට හදුනා ගැණිමට හැකිවු දෙයක් විය. මේ නිසාමදෝ  1970 දී බලයට පත් වූ සමඟි පෙරමුණු ආණ්‌ඩුව ලේක්හවුස් ආයාතනය රජයට පවරා ගත්තේය. ආම්බන් කිරීමට නොහැකිවු දවස අයාතනය වසන තැනට පත්කලේය. ගුවන් විදුලිය තම හොරණැව බවට පත් කර ගත්තේය.

ගුවන් විදුලියෙන් සහ ලේක්හවුස් ආයාතන ප්‍රවෘත්ති පත්‍ර වලින්  සමගි පෙරමුනු ආණ්‌ඩුවේ පම්පෝරිය  මිස අන් යමක් අසන්නටත් බලන්නටත්  නොතිබු හෙයින් අප  ගුවන් විදුලි යන්ත්‍ර වසා දමා ලේක්හවුස් ප්‍රවෘත්ති පත්‍ර භාවිතයෙන් ඈත් කලේය. මේ හිදැස පුරවන්නට 1977න් පසු ඇතිවු එෆ්. එම්. නාලිකා අද වන විට  ඉතා ජනප්‍රිය ය. එහෙත් මහත් කන්කරච්චලයක් බවටත් පත්ව ඇත. අප රජයේ ගුවන් විදුලියට සවන් දෙන්නේ අවමංගල දැන්වීම් දැන ගනු පිණිස පමණක් වී ඇත.

1977 බලයට පත්වු ඡේ. ආර්. ජයවර්ධන ආණ්‌ඩුව රූපවාහිනිය මේ රටට හඳුන්වා දුන්නේය. එහෙත්  ඡේ. ආර්. ජයවර්ධන මහතා   වැඩිපුර මාධ්‍යය තම ප්‍රතිරූපය නංවාගන්නට පාවිච්චි කළේ නැත.ඔහුගේ දේශණද ඉතා කෙටිවු අතර “කොරන්න බැරි දෙයක් නොතිබු” එතුමා  හට තම තිබු ප්‍රතිරූපය ඕනවටත් වඩා ප්‍රමානවත් විය.   එකල ඊටත් හරියන්නට මාධ්‍ය පාවිච්චි කළේ අගමැති ප්‍රේමදාස මහතා ය. ඔහු ජනාධිපති වූ පසු තත්ත්වය තවත් බරපතළ වූ අතර ඔහුගේ මුහුණ හැම විටම රූපවාහිනිය මගින් දර්ශනය විය. ගුවන් විදුලියේ තොරතොංචියක් නැතිව ජනාධිපති ප්‍රේමදාස  වර්ණනා කලේය. ජනාධිපති ප්‍රේමදාස මහතා නො කළේ ප්‍රවෘත්ති කීම සහ කාලගුණ වාර්තා කීම පමණක් බව එකල කතා බහට පත්වු යාන් හෑල්ලක් විය..

චන්ද්‍රිකා මැතිනිය බලයට පත් වූ පසු ප්‍රසිද්ධියේ දේශපාලන විරුද්ධවාදීන්ට බැණ වැදීමටත්, “ඇද කිරීමටත්” රූපවාහිනිය පාවිච්චි කළේය.

ඉන් පසු එන්නේ රාජපක්‍ෂ යුගය යි. යුද්ධය නිමවු පසු වර්තමානය වන විට රාජ්‍ය නාලිකාවලට රාජපක්‍ෂ සමාගමේ කොටස් කරුවන් ගේ ප්‍රවෘත්ති හැර වෙනත් කිසි ප්‍රවෘත්තියක් නැත. සිරසට රනිල් වික්‍රමසිංහ මහතාගේ ඇදකුද  සමග  කුණු ගොඩවල් පෙන්වමින් රජය බිය ගැන්වීමේ  ප්‍රවෘත්ති කලාවක් ඇත. ස්වර්නවාහිණියෙන් පෙන්වන්නේ ප්‍රවෘත්තිද නැත්නම් වෙනත් ප්‍රසාංගික නාට්‍යයක් ද  ?. එෆ්. එම්. නාලිකාවල කියවන්නේ ප්‍රවෘත්තිද නැත්නම් මරණ දැන්වීම්ද යන්න කියා හිතා ගන්නත් බැරිය.

එදා සමාජ අධ්‍යයනය විෂයයට කරුණු සොයා ගන්න අනිවාර්යෙන්ම ප්‍රවෘත්ති ඇසු කඩුල්ලී අදවන විට හරයක් නැති පම්පෝරි  අසා බලා  ප්‍රයෝජනයක්  නැතැයි කියා  ප්‍රවෘත්ති වෙලාවට රූපවාහිණිය හෝ ගුවන් විදුලිය සොයා යන්නේ නැත.

නස්‌රුදීන් කලින් කලට  විවිධ භුමිකා වන් වල ජීවත් වන බහුශුත්‍රයෙකි. මේ කියන කාලය වන විට ඔහු දේශකයෙක්‌  ලෙස ගමක්‌ ගානේ ගොස් දේශන පවත්වමින් සිටියා. මෙසේ දේශණ පවත්වමින් යන විට  එක ගමකදී ඔහු අධිකරණයෙන්   වරදකරුවෙකුවී මරණ දඩුවම නියමවුණ වරදකරුවෙක්‌  ඝාතනය කිරීම සදහා  ඝාතනාඝාරයට  කැඳවාගෙන පෙරහරක් හමුවුනා.

නස්‌රුදීන්ටත්  මෙම පෙරහරට එක්වී ඝාතන ස්‌ථානයට ඇදෙන මිනිසුන් සමග  මරණකරු  දඩුවම විදින අන්දම  බලාගන්න යාමට සිතක් පහලවුනා .  නස්‌රුදීන් පෙරහැරට එක්වී යන අතර ඔහු මේ අවාසනාවන්ත වරදකරු දිහා බැලුවා. ඔහුගේ ශරීරය සම්පූර්ණයෙන්ම වදමල්වලින් සරසල හිසෙත් වදමල් ඔටුන්නක්‌ පළඳවලා. ඔහු ගියේ හරිම අපහසුවෙන්. ඔහු දැඩි ලෙස මරණයේ  වේදනාවෙන් පෙළෙන බව නස්රුදීන්ට තේරුම් ගියා .

නස්‌රුදීන් කල්පනා වුනා  මේ අසරණයා එකපාරටම මරණයට පත් නොකර ඇයි මේ විදියට වද දෙන්නෙ කියල.දැන් පෙරහැර වධකාගාරයට ලංවෙලා. වධකාගාරය අසල විශාල පිරිසක්. ඒ අතර දේශකයෝ කිහිප දෙනෙක්ම මේ වරදකරු ගැන දේශනා පවත්වනවා. මේ දේශකයෝ හැමදෙනාමත් වරදකරුගේ දඩුවම සාධාරණිය කරමින් දේශණ පවත්වනවා.   දේශකයෙක්‌ ලෙසට ප්‍රසිද්ධවු  නස්‌රුදීනුත් දේශණයක් කරන්න අවසර ඉල්ලා ගත්තා.

ඔහු දේශණය පටන් ගත්තා.

“ මිනී මැරීමේ ක්‍රම කීපයක්‌ම තියෙනවා.මෙන්න බලන්න එකක්
ක්‍ෂණික කෝපය නිසා මිනිස්සු මිණිමරනවා. තව එක් කුමයක් තමයි  තමුන්ට කවුරුවත් බලවත් අතවරයක් කරන්න ආවොත් තමන්ගේ ආත්මාරක්‍ෂාවට කියල බයටම අනෙකා මරාදානවා.  සමහරු සැලසුම් කරලා කුමන්ත්‍රණය කරල ප්‍රතිවාදියා මරනවා. මීට වඩා වෙනස් මිණිමැරුම් අධිකරණයෙන් කරනවා. නඩු අහලා වැරදි කාරයා වුනාම වැරැද්දේ ප්‍රමාණයට මරණ දඩුවම නියම කරනවා. මේ කොයි කුමයෙන් කලත් කරන්නේ මිණිමැරීමක්.

දේශණය අහගෙන හිටපු ශ්‍රාවකයෙක්නස්රුදීන් ගෙන් ප්‍රශ්නයක් ඇහුවා .
“එතකොට ඔය හතරෙන් වඩාත්ම භයානක එහෙම නැත්නම් වැඩිදෙනෙක්‌ම ප්‍රාණගාත පාපය සිදු කරගන්නා මිණීමැරීම  මොකක්‌ද?”

“නඩු අහල මරණ එක.”  කියලා උත්තර දුන්න  නස්‌රුදීන්    දේශණය නතර කරලා  වධකාගාරයෙන් නික්මිලා යන්න ගියා  .

සබරගමු විශ්වවිද්‍යාලයේ ජ්‍යෙෂ්ඨ ශිෂ්‍ය උපදේශක වෛද්‍ය සංජීව ප්‍රසාද් ජයවීර මහතාගේ නිල නිවසට හා වාහනයට පහරදී අලාභ සිදුකිරීමේ චෝදනාව මත රක්‍ෂිත බන්ධනාගාරගත කර සිටි සිසුහු පස්‌ දෙනා (17 වැනිදා) ඊයේ දින බළන්ගොඩ මහෙස්‌ත්‍රාත් හා දිසා විනිසුරු අරුණි ආටිගල මහත්මිය හමුවට ඉදිරිපත් කරනු ලැබූහ.

ඉන්පසුව හඳුනාගැනීමේ පෙරෙට්‌ටුවක්‌ තබා එහිදී හඳුනාගත් සිසුන් පස්‌ දෙනාට එක්‌ අයකුට රුපියල් ලක්‍ෂයක්‌ බැගින් ඇප මත මුදාහැරීමට නියෝග කරන ලදී.

මෙසේ ඇපමත මුදාහරිනු ලැබූ ආර්. එම්. ඩී. හේමාල් රණසිංහ, එම්. එන්. එම්. නලීන් නිරෝෂන්, එම්. ආර්. නිරෝෂන්, සම්පත් චන්ද්‍රසේන, ඩී. කේ. චරිත් අමිල දිසානායක, කේ. ඒ. ඩී. සම්පත් තිළිණ යන පස්‌ දෙනාට ලබන ජුනි 5 දා යළි අධිකරණය හමුවේ පෙනී සිටින ලෙසද විනිසුරුවරිය නියෝග කළාය.

මෙයට අමතරව සෑම මාසයකම අවසන් ඉරිදා සමනළ වැව පොලිස්‌ මුරපලට වාර්තා කර අත්සන් තබන ලෙසද නියෝග කෙරිණි.

–
බළන්ගොඩ – එන්. එච්. පියසේන -  දිවයින
අපේ සරසවි සිසුන් නොකරන්නේ එකම දෙයකි.

අන් හැම සමාජ සත් කාර්ය්‍යන් සියල්ලටම අත හිත දෙමින්  යහපත් සමාජයක් නිර්මාණය කිරීම සදහා දිවි පරදුවට තබා කටයුතු කරති. මෙවන්  සරසවි සිසු පරපුරක් අපට සිටීම සම්පතකි. මෙවන් සිසු පරපුරක් ජාතියට දායාද කල මව් පියන් නිතර නිතර සිහිපත් කිරීම ජාතියේ පිනකි.

වර්තමාණය වන විට සියළු විපක්‍ෂ දේශපාලන පක්‍ෂ දේශපාලනය තුල නිදා වැටෙමින් සිටිති. ජීවයකින් පිරී තිබු ජනතා විමුක්ති පෙරමුණද දේශපාලන හා විප්ලව කණ්ඩායම් දෙකකට වී විප්ලව කණ්ඩායම පමණක් පණක් ඇති බව රටටම පෙන්වමින් සිටී.

විප්ලව කණ්ඩායම ජීවය පෙන්වන්නේ සරසවි සිසුන් මහ මගට ගෙන්වා ගමිනි. වැඩබිම තුල අයිතිවාසිකම් සදහා සටන් කරමිනි.

ජපුර සරසවියේ සිසු ස්මාරකයට නිවටයෝ බෝම්බ තිබු විට අරලිය ගහ මණ්දීරයටම අවනඩුව කියන්නට මොහොතකින් වීදී බැස්ස අපේ විරු දරුවෝ  සබරගමුවේ සරසවි ඇදුරෙකුට ඇට්ටි හැලෙන්න ගල් මුල් වලින් පහර දෙමින් තම වීරෝධාර හා සටන් කාමීත්‍වය පෙන්වනු ලැබිණි. මේ සියල්ලම කර අධිකරණය හමුවේ වීරෝධාර  තරුණයන් මෙන් පෙනී සිටිමින් සෑම මසකම අවසන් ඉරිදා පොලිසියේ සිංහ පැටව් මෙන් පෙනීසිටිමින් විශ්ව විද්‍යාල වරම අළුයම ළු කෙල පිඩක් මෙන් බැහැර කරති.

කෙතරම් ආඩම්බරයක්ද ? මේ සියළු පරිත්‍යාග කරන්නේ අනාගත සිසු පරිසරයේ උණ්නතියට බව නොසිතන්නේ නම් මේ දරුවන්ගේ කාලකණ්නිකමකි. අවාසනාවකි..

උපාධිය ලංකාවේ විකිනෙන්නේ නොවැදගත් දෙයක් ලෙස නොමිලේය.නොමිලයේ දෙන දෙයක වටිනාකමක් ඇත්ද ?.

මේ නොමිලේ දෙන උපාධියට අපේ වැසියන් උපයන සැම සතයෙන්ම සෘජු සහ වක්‍ර බදු ලෙස අයකරගන්නා නැත්නම් සූරා ගන්නා ඒත් නැත්නම් මංකොල්ලා කා ගන්නා 70% ක් පමණ බදු මුදලින් සොච්චමක් අයත් වන බව මේ දරුවන් හට කියා දෙන්නට කෙනෙක් නැත. දරුවන්ට  වැටහෙන්නේ ද නැත. ඉස්සර මධ්‍යම පාන්තිකයන් කියා ගන්නා දෙමව්පියන් ගේ සරසවි වරම් ලැබු දරුවන්  පේරාදෙණියට යවන්න ඉඩකඩම් උකස් තිබ්බත් විකුන්නත් දැන් දැන් මේ පන්තිය තම දරුවන් හට පිටරට උපාධියක් ලබා දීම  තකා ඒ දේ කරන්නේ  සරසවි  විරු දරුවන්ගේ ක්‍රියා කලාපයට ඇති ඊෂ්‍යාව නිසාද යන්න තේරෙන්නේ නැත.   පිටරට උපාධියට පෞද්ගලික අංශය හොද මිලක් ගෙවන  බව හදුනාගෙනද යන්න හිතාගන්න බැරිය. අපේ උපාධිය පෞද්ගලික අංශය ප්‍රතික්‍ෂෙප කරන බව හදුනා ගෙන ඇතිදෑයි සැකයක්ද ඇත .

සරසවි සිසු දරුවන් ජාතිය අවදි කරලිම සදහා මේ කරන ව්‍යායාමයට ජයවේවා!.  ඒ දරුවන් නොකරන එකම දෙය  කර ගැණිමට සියළු දෙවි දේවතාවුන් විසින් ඔවුන් දැනුවත් කෙරෙත්වා !.  රැකවරණත් ආශිර්වාදයත්  ඇති වේවා!.

httpwww.cruisecritic.comreviewsreview.cfmShipID=368

Royal Caribbean's Oasis of the Seas, the world's largest cruise ship, has been the most anticipated new-build to debut since Cunard's Queen Mary 2. Its innovations -- such as the first-ever Boardwalk and Central Park at sea, which uniquely occupy space that's carved out of the middle of the ship -- are already legendary.

Related articles

• Royal Caribbean International Takes Delivery of Much Anticipated Oasis of the Seas (prweb.com)